Bjørn Bay: Inatsisip atuutsinneqarnera ajornakusuussaaq

Imigassartorsimatilluni imaatigut angalanermi inatsit ukioq manna juulip aallaqqaataaniit sukateriffigineqalissaaq.

FN-ip imarsiornermik peqatigiiffiata piumasaqarneratigut, Danmarkillu inuussutissarsiornermik aningaasaqarnermullu ministeriata, Bendt Bendsenip, siunnersuuteqarneratigut tamanna piviusunngussaaq.

Bendt Bendtsenip siunnersuutaa ukioq manna juunip ulluisa aappaanni Folketingimi taasissutigineqarmat ilaasortat tamarmiullutik siunnersuut taperserpaat.

Nunattali vicepolitimesteriata, Bjørn Bayip, oqaatigaa inatsisip nunatsinni atuutsinneqarnera ajornakusuussasoq, sineriassuarput isorartoqimmat nakkutiginnittussallu amerlagisassaanatik.

- Inuilaami ullorpassuit qamanissarput pissusissamisoorsorinngilarput, Bjørn Bay oqarpoq, nangillunilu:

- Imigassartorsimatillutik imaatigut angalaartunik pasisaqarutta pakasaalluta misissuisinnaanissarput periarfissaraarput, Bjørn Bay oqarpoq.

Imaatigut angalanermi sillimanissaq pillugu inatsiseqarpoq, aatsaalli massakkut promille-mik killiliisoqarsinnaalissalluni.

Aalakoornartup aammi promillia qummut 0,5-i qaangersimappagu pineqaatissiisoqarsinnaalissaaq.

Inuussutissarsiutigalugu angallassisut, nuannaariartaammillu angallassisimasut aalakoorsimappata pineqaatissinneqarsinnaalissapput.

Aammattaaq aalakoorluni sukkasuuliamik angalasoqarsimappat, vandscooterinillu taaneqartartunik angalasoqarsimappat pineqaatissiisoqarsinnaalissaaq.

Naalagaaffiit Peqatigiiffiata, FN-ip, imarsiornermik peqatigiiffianni, IMO-mi, maajimi aalajangerneqarpoq imigassartorsimatilluni angalasarneq akiorniarlugu inatsiseqartariaqalersoq.

Imarsiornermik Ilinniarfiup pisortaa, Lars Wall-Andersen, inatsisip sukaterneqarnissaa tikilluaqquaa, oqarluni Kalaallit Nunaanni umiatsiaararsorluni ajutootarnerit amerlasuut imigassartorsimanermik peqquteqarajuttartut.