Japanimi ilisimatusaatigalugu arfanniartarneq akerliuffigalugu Australiamiut ullumi ingerlaaqatigiipput. Japanimi naalakkersuisut arfanniartarneq unitsinniarlugu iliuuseqarsinnaanerat ingerlaaqatigiinnit neriuutigineqartoq, Australiamiut nutaarsiassaqartitsiviata nalunaarutigaa.
Ingerlaaqatigiittoqarnerata nalaani arfanniarneq pilllugu ataatsimiititaliarsuup ukioq manna ataatsimeersuarnissaa Japanimiunit piareersarneqarpoq.
Nunat 19-t arfanniarneq pillugu ataatsimiititaliarsuarmi ilaasortanngornissaminnut japanimiunit kajumisaarneqareerlutik ilaasortanngorsimasut, Tuluit nutaarsiassaqartitsiviisa nalunaarutigaat.
Nunat ataatsimiititaliarsuarmi ilaasortat aningaasarsiutigalugu arfanniartarnerup inerteqqutigineqarnera atorunnaarsinniarlugu anguniagaqarnerat nunanit ilaasortanngorlaanit tapersersorneqassaaq. Nunat taakku tapersersuinerannut taarsiilluni Japani aningaasaliisassaaq.
Nunat ilaasortaasut 40-t sinnerlugit aatsaat akuersippata inerteqqutaatinneqartoq atorunnaarsinneqarsinnaavoq tamannalu ajornakusooqaaq. Arfernik toqoraanerup inerteqqutaalernissaannut arfanniartarnermut akerliusut, soorlu Australiamiut, nukissaqarluarput.
Caribiap qeqertaasa ilaanni arfanniarneq pilllugu ataatsimiititaliarsuarmi ilaasortat ukioq manna ataatsimeersuassapput. Nunarput sinnerlugu Danmark ataatsimeersuarnermi peqataatitaqartarpoq.