”Tuluttut oqalukkunnaarlusi inuktitut oqalulissaasi”.
Nunavummi pisortat suliffeqarfiini atorfillit pinngitsaalisaallutik oqaatsinik ilinnialerput.
2008 tikitsinnagu ilikkarsimanngikkunik soraarsitaasinnaasut, TV-qarfissuaq CBC, allappoq.
Nunavummi ministeriunerup, Paul Okalip, oqaatsit pillugit piumasaqaatit nutaat ippassaq saqqummiuppai. Atorfilittat qulit ukiup aappaata affaani tulliuttumi sapaatip akunneranut pingasoriarlutik oqaatsinik ilinniartassapput.
– Piffissanngorpoq inuktitut oqaatsit ataqqineqalernissaat, Paul Okalik oqarpoq.
Pisortat suliffeqarfiini tamani atorfillit inuktitut oqalussinnaanissaat siunissami ungasinnerusumi anguniarneqassaaq.
Tamakkunani sulisut tamarmik 2020-mi inuktitut oqalussinnaalereersimanissaat Nunavummi naalakkersuisut anguniarpaat.