Arctic Green Food isornartorsiorneqarpoq

Qeqertarsuatsiaani Arctic Green Foodimi sulisut atukkatik naammagiunnaarpaat. Atortut ullutsinnut naleqqutinngillat, sikuliorfillu ukiorli aserorluni.

- Ajornartorsiutit aaqqiivigineqassappata sukkanerpaamik iliuuseqartoqartariaqarpoq. Qullersat namminneerlutik maanga alakkaasariaqarput. Arctic Green Foodip Qeqertarsuatsiaani suliffeqarfiutaanni sulisoq, Ingvar Motzfeldt, sulisut sinnerlugit oqarpoq:

- Maanga alakkaaniarlik. Oqaloqatiginiarlisigut, paaseqatigiittariaqarpugut. Pitsaanerusumik aqutsisoqartariaqarpoq, Ingvar Motzfeldt oqarpoq.

Taanna aamma oqarpoq suliffeqarfimmi maskiinalerisoq siorna soraarmat nammineq maskiinalerisutut naammassisimanngikkaluarluni akisussaaffimmik tunineqarsimalluni, sullivinnillu nakkutilliisut tikilermata atortunik atoqqusaanngitsunik toqqortereqqusaasimallutik, aallarmatalu atortut atoqqiliinnarsimagitik.