Da Vinci Mysteriet aamma Savalimmiuni
Skrevet af Mads Lynge
Savalimmiuni filmertarfinni assigiinngitsuni filmi Da Vinci Mysteriet takutinneqassamaanngikkaluariarluni maanna inuup ataatsip iliuuseqarneratigut takutinneqartussanngorpoq.
Torshavnimi kulturip illorsua kiisalu Nordisk Film isumaqatigiissusiorfigalugit inuup ataatsip filmip takutinneqarsinnaalernissaa piviusunngortippaa.
Savalimmiuni filminik nakkutilliisut filmi takoreerpaat akuerereerlugulu.
- Filmi Guutimik mitaatiginnittuunngilaq assuarnartuliaananilu, filminik nakkutilliisut oqarput, filmilu takussagaanni 18-ileereersimanissaq piumasaralugu.
Da Vinci Mysteriet Savalimmiuni filmertarfiutilinnit takutinneqarusussimanngikkaluarpoq, taakku oqaramik filmi Guutimik mitaatiginnittuusoq.