Ujaasineq unitsippaat
Ilulissat eqqaanni umiatsiaaraq Poca 475 Marinerimik 40 hiistilimmik motoorilik inuttaqanngitsoq ippassaq nassaarineqarpoq, Ilulissalli politiivisa nalunaarutigaat ajunaarsimasinnaasunik ujaasinertik unitsiinnarsimallugu.
- Umiatsiaaraq inuttaqarsimanersoq inuttaqarsimannginnersorluunniit oqaatigisinnaanngilarput. Aamma maqaasineqartunik nalunaartoqarsimanngilaq, taamaammat ujaasinerput unitsiinnarparput, Ilulissani politiassistenti Flemming Lauritzen oqarpoq.
- Umiatsiaaqqap motooria unissimavoq, gearitaali nikisinneqarsimalluni. Sukkatsittaataalu napisimammat isumaqaraluarpugut umiatsiaararsortoqarsimasoq. Umiatsiaaraq tillineqarsimassaaq, gearitaalu ikkuneqaannarsimassagunarluni, Flemming Lauritzen oqarpoq.
Sakkutuut timmisartuutaat Gulfstream G3 atorlugu ujaasineq ingerlanneqarsimagaluarpoq.