USA: Paasissutissat allannguititsisinnaapput

Irakip illoqarfiisa ilaanni amerikamiut sakkutuui ikinngutiminnik akiniussillutik inoqutigiinnik aqqanilinnik inuttalinnik toqoraanerat saqqummiunneqareersorlu ullut marluk qanngiummata videomik immiussaq saqqummerpoq.

Taamatut saqqummiussineq amerikamiunit qanoq qisuariarfigineqarsimanersoq DR-ip ilanngutassiortuata Steffen Gramip Washingtonimiit ima oqaluttuaraa:

- Amerikami naalakkersuisut, naalakkersuinermik suliaqartut kiisalu sakkutuut qullersaqarfianit paasissutissat allat saqqummiunneqarnissaat soorlu suli isertuukkaat. Saqqummiussassat sisamat nuannerpallaanngitsut maanna suliarineqartut Irakimi oqaaseqartartoq nalunaaruteqarpoq, Steffen Gram oqarpoq. Nangipporlu:

- Taamatut nalunaaruteqartoqarmat pasitsappunga amerikamiut nunani allamiusulli sorsukkiaraangamik peqqarniitsigisarnertik taamaalillutik paasilissagaat. Massakkumulli uppernarsaatissanik suli takkuttoqanngilaq. Irakimi naalakkersuisut siulittaasortaavat sakkortuumik piumasaqarpoq suut tamarmik uppernarsaasersorlugit saqqummiuttaqqullugit misissuinerlu qanimut nammineq malinnaaffigerusussimavaa pinerluttoqarsimappallu ajortuliortuusimasut pillarneqarnissaat piumasarisimallugu, Steffen Gram oqarpoq nangeqqipporlu:

- Amerikamiut Irakimiullu suleqatigiinnerat najummassimanartorsiulerataannaavoq. Nunanilu taakkunani naalakkersuisut qanittumi ataatsimiissallutik nalunaaruteqarput, ataatsimeeqatigiinnermilu amerikamiut paasissutissat tamakkerlugit tunniutissaneraat suli nalorninarpoq, Steffen Gram oqarpoq.

Amerikamiut sorsuttarnerannut tamanna sunniuteqassanerluni?

- Sorsuttoqartarneranut amerikamiut isummeriaasiat allanngorataannavoq. Qaammatinilu sisamani kingullerni sakkutuunik ilinniartitsinerit allannguiffigineqarsinnaapput, Steffen Gram naggasiivoq.