Hermann Berthelsen: Bussini ussassaarineq killeqartariaqarpoq
Bussini pilerisaaruteqarsinnaaneq illoqarfinni anginerni killeqartinneqanngitsoq, Sisimiut kommuniat pilerisaarutinik killilersuivoq. Kommunalbestyrelsemi aalajangerneqaqqammerpoq partiit upperisaqaqatigiillu bussini pilerisaarisinnaanngitsut.
Ilulissani, Qaqortumi Nuummilu bussit killeqanngitsumik pilerisaarusersorneqarsinnaapput. Nuup Bussiini ingerlatsinermik pisortap René Hansen-ip oqaatigaa, Nuummi bussit qanorsuaq pilerisaarusersorneqarsinnaasut, inunnut narrujuumminartuunngippata.
Sisimiunili taamaanngilaq. Kommunalbestyrelsip aalajangeqqammerpaa Sisimiuni bussini tallimaasuni politikkikkut oqariartuutinik upperisanullu tunngasunik pilerisaaruteqassanngitsut.
-Kommunalbestyrelsimi qaqipparput politikkikkut partiininngaanniit suliffeqarfinninngaanniillu ussassaarutinik bussinut ikkusserusullutik siornatigut kissaatigineqartarsimammat. Isumaqarpugut ussassaarutinut siullertut periarfissaqartut tassaasariaqartut niuertukujuit arlaatigullu inuutissarsiortut, taamaalillutik niuernerminnut iluaqutigisinnaaniassammatigit, Sisimiuni borgmesteri Hermann Berthelsen oqarpoq. Ilulissani, Qaqortumi Nuummilu pilerisaarutinut taamatut killilersuisoqanngilaq. Nuummili bussini aqqaneq marluusuni immiaaqqanut pilerisaarineq ukiut tallimat qaangiummata unitsinneqarsimasoq, bussini ingerlatsinermut pisortap René Hansen-ip oqaatigaa.
Peqatigiiffiit suliffeqarfiillu bussit atorlugit Nuummi ussassaariniarunik akikitsuinnaanngilaq. Assersuutigalugu bussip talerpiatungaani ussassaaruteqarniaraanni ukiumut 60.000 koruuninik akeqarpoq, saamiatungaani akikinnerulaarluni 50.000 koruuneqarami.