Qaami aallartinnerlioraluarluni angusaqarfiulluarpoq

Københavnimi kalaallit suliffissaaleqisut suliffissaqalernissaat anguniarlugu pikkorissartitsisoqarpoq, pikkorissartitsineq taaguuteqartinneqarluni Qaami. Pikkorissartitsinermi atugassarititaasut pitsaanerpaasimanngillat, pissutsillu naammagiunnaarlugit pikkorissartut ilaat ataaseq uniinnartariaqarsimavoq. Pikkorissartitsinermik aaqqissuisoq Klaus Ebbesen nassuerpoq pikkorissaanerup aallartinniarnera ajornaatsuinnaasimanngitsoq:

- Pikkorissartitsisoqaleraangat akimmiffissaaloqartuaannartarpoq, pikkorissartut ilinniartitsisorlu tamatigut imminnut ilisarisimasuusanngimmata, pikkorissariarlutillumi takkuttut ilimagisatsinnit amerlanerunerat aamma pakasaaqataammat eqimattakkuutaat amerlasariaqarsimavagut.

Aallartisarneq akimmiffissaararpassualik qaangiuppoq pikkorissarnerlu massakkut ingerlallualersimasoq Ebbesen oqarpoq.

Pikkorissarnermi peqaatasimasoq, Kirstine Berthelsen ippassaq oqarpoq pikkorissarnermi ajornartorsiutaasut, soorlu suleqatigiilluarpallaannginneq ilinniartitsisussaaleqineq atuartitsivissaaleqinerlu naammagiunnaarlugit pikkorissarnini unitsiinnartariaqarsimagini, pissutsit taamaannerisigut pissarsiaqarnissi naatsorsuutigiunnaaramiuk.

Tassunga Klaus Ebbesen ima akivoq:

- Uanga naammagittaalliutissaqanngilaga, inuit 40-it massakkut pikkorssareerput, arlallit suliffittaarsimapput, arlallillu suliffittaarnissaminnik aamma neriorsorneqareersimallutik, tamaattumillu isumaqarpunga pikkorissartitsineq iluatsilluarsimasoq. Kalaallit oqaatsitigut ajornartorsiuteqartarnerat Københavnimilu ikinnerussuteqartutut inissisimanerat taamaalilluni aamma sammineqarpoq, Klaus Ebbesen oqarpoq.

Qaamip ilaatigut EU-p isumaginninnermut aningaasaateqarfianit aningaasalerneqartup, pikkorissartitseqqissinnaanissaa pillugu Københavnip kommunia isumaqatigiissuteqarfiginiarneqassaaq.