Kalaallit Nunaata USA-llu akornanni timmisartuussisalernissaq Air Greenlandimut akilersinnaasariaqarpoq, pisortaaneq Flemming Knudsen isertornani oqarpoq.
- Timmisartuussisarnissaq iluatsissappat nittarsaalluartariaqarparput, erseqqissaavoq.
Namminersornerullutik Oqartussani takornariaqarnermut inuussutissarsiornermullu siunnersuisoqatigiit ikiuunnissaannut Air Greenlandip pisortaaneranit kajumissaarneqarput:
- Suliassarujussuuvoq, aningaasarpassuillu atorneqartussaassapput. Taamaattumik Namminersornerullutik Oqartussaniit nittarsaassinissatsinnut aningaasaliiffigineqarnissarput neriuutigaarput. Baltimorellu mittarfeqarfianit 1 imaluunniit 2 millioni koruunit missaanni nittarsaassinissamut atugassanik Air Greenland taperserneqarniarluni neriorsuiffigeqareersoq Flemming Knudsen nalunaarpoq. Taannalu isumaqarpoq taama amerlatigisunik Namminersornerullutik Oqartussanit taperneqartariaqarlutik.
- Iluatsilluassappat takornariaqarneq aqqutigalugu Kalaallit Nunaat iluanaaruteqassaaq. Takorniariat akileraarutillu timmisartuussisalernitta kingunerisaanik amerleriarpata Kalaallit Nunaata iluanaarnissaa ilimagaara. Baltimorep mittarfianit 1 imaluunniit 2 millioni koruuninik taperneqarniarluta neriorsorneqareeratta Namminersornerullutik Oqartussanit taamatut taperneqarnissarput neriuutigaara, Flemming Knudsen oqarpoq.
Tapiissuteqarnissamik kissaateqarneq takornariaqarnermut inuussutissarsiutinullu siunnersuisoqatigiit pisortaata, Stig Rømer Wintherip, tupaallaatigaa, tamatumalu qanoq ililluni piviusunngortinneqarsinnaanera takorloorumaatsillugu.
- Air Greenland namminersortuuvoq tasamungalu timmisartuussisalernermi kingunerisaanik amigartooruteqassaguni nammineq pisuussutigissavaa. Sinneqartooruteqassagunilu aamma tamanna pisuussutigissallugu, Stig Rømer Winther oqarpoq.
Air Greenlandip takorloorpaa sapaatip-akunneranut ataasiarluni Kangerlussuarmiit Baltimoremukartitsisassalluni.