Umimmaat, tuttut savallu neqaat nunatsinneersut USA-mut maanna tuniniarneqarsinnaanngorput. Namminersornerullutik Oqartussani pisortaaneq, Kaj Kleist, taama nalunaarpoq. Uumasut taakku neqaannik avammut tunisisinnaanermut ammaassinermut Kaj Kleistip pissutaanerarpaa, neqinik nakkutilliinermik USA-mi suliallit isumaqarmata, Kalaallit Nunaanni uumasut pinngortitami uumasuunerat pingaartuusoq, mattullugit kinguaassiortitaaneq ajormata.
Neqinik qaqugu qanorlu tunisisinnaasoqalissanersoq Kaj Kleistip oqaatigisinnaannginnerarpaa. Kalaallit Nunaata, USA-p Danmarkillu aallartitaasa, tassa Joint Committeep, pingajussaanik ataatsimiinneranni neqinik avammut tuniniaasinnaaneq ammaanneqarpoq. Joint Commitee Københavnimi ulloq naallugu ataatsimiissaaq.