Allattoqarfik naalakkersuisut siulittaasuannut paatsuunganartunik paasissutissiisimavoq

Nunaqarfiit ataatsimeersuarnissaannut tunngatillugu Naalakkersuisut siulittaasuata atorfilittaasalu akornanni attaveqarneq

naammaginanngilluinnarsimavoq. Paatsooqatigiinnerit annertuut pisimapput, maannalu naalakkersuisut allattoqarfiani pisortap Kaj Kleist-ip tusagassiutinut nalunaaruteqarnermini nassuerutigaa naalakkersuisut siulittaasuannut attaveqaqatigiinnermi Allattoqarfiup iluani paatsoortitsisoqarsimasoq.

Naalakkersuisut siulittaasuata radioaviisimi pingasunngormat oqaatigaa Toornaq Consulting Aps-imut 80.000 koruuninik akiliuteqarsimaneq ilisimasaqarfiginagu. Peqatigisaanik aallakaatitap ingerlanerani oqaatigineqarpoq naalakkersuisut siulittaasuata Demokraatimeersumut Lene Knüppel-imut akissuteqarnermini iliisimatitsissutigisimagaa isumaqatigiissut 80.000 koruuninik akeqarsimasoq.

Allattoqarfik maanna tusagassiutinut allapput Toornaq Consulting-imik isumaqatigiissutip atorunnaarsinneqarneranut tunngatillugu paasinartoq naalakkersuisut siulittaasuannut attaveqaqatigiinnermi Allattoqarfiup iluani paatsoortitsisoqarsimasoq, tamannalu Kaj Kleist-ip ajusaarutigalugu nalunaarutigaa.

Nunaqarfiit ataatsimeersuarnissaanni qaammatip tulliani pisussami Siunnersuisartut Toornaq Consulting ataatsimeersuarnermi aaqqissuisussatut siullermik toqqarneqarsimagaluarput. Taakku Arctic Innovators-ikkunnik Nuummi Siumup immikkoortortaqarfiani siulittaasup tullianik Per Kunuk Lynge-mik ingerlanneqartumik taarserneqarput, taarsiinermut peqqutigitinneqarluni 2004-mi nunaqarfiit ataatsimeersuarneranni taakku aaqqissuisooreersimammata ilisimariigaallu atorluarusunneqarmata.

Arctic Innovators-ikkut nunaqarfiit ataatsimeersuarnerannik aaqqissuussinerat 264.000 koruuninik akeqarpoq.