Sakkutuunut palæstinamiut præsidentiannut, Mahmoud Abbasimut, tunniusimalluartunut sakkunik sakkortoorsuunngikkaluanik imassanillu nassitsinissamik akuersissuteqarniarluni Israel aalajangerpoq.
Israelimi illersornissamut ministereqarfik ullumi taama nalunaarpoq.
Sakkut untritillit arlalissuit nunanit assigiinngitsuniit tikisinneqartartut pineqarput, taakkulu nassiussuunnerat nakkutigilluaqqissaarneqassaaq.
- Sakkut kimut sumilu tunniunneqarnersut ilisimaqqissaarusupparput, naalagaaffimmi atorfillit ilaat oqarpoq. Sakkutuut Abbasimut tapersersuisut sakkutuullu palæstinamiut najugaqarfiini naalakkersuisunut Hamasikkunnit nakkutigineqartunut tapersersuisut sakkuaatileruttorneranni nalunaarut una tutsiuppoq.