Namminerisatsinnik pappialanik 2008-imi aningaasaqalerutta kalaallit oqaluttuaatitoqaat pinngortitarlu assiliartaassapput.
Namminerisatsinnik aningaasaqalernissarput pillugu suleqatigiissitaliaq ippassaq ataatsimiippoq, aningaasani pappialani suut assiliartaassanersut eqqartorlugit, isumaqatigiissutaavorlu ilisarnaataat nunatsinnut tunngasuussasut.
- Kalaallit oqaluttuaatitoqaat kimilluunniit naluneqarunanngillat, atuartuunerup nalaani tamakku tusarneqartarsimasinnaapput, tunuliaqutaallu ilisimaneqalerlutik, suleqatigiissitami siulittaasoq, Kaj Kleist, oqaluttuarpoq.
Suleqatigiissitap saniatigut peqataapput aningaaserivissuarmi Nationalbankimeersut, Norgemi, Frankrigimi nunanilu EU-mut ilaasortaasuni aningaasat pappialat sunik assiliartaqarnersut taakku takutippaat, isumassarsinissaq eqqarsaatiginerullugu.
Eqqumiitsuliortut kikkut peqataatinneqassanersut Kaj Kleistip saqqummiukkumanngikkallarpaa. Sunarpiaq assiliartaliunneqassanersoq apeqqutaavoq, oqarpoq.
Kalaallit namminerisamik aningaasaatissavut 2008-imi januaarip ulluisa aallaqaataanni saqqummissangatinneqarput, siunnersuulli Inatsisartuni Folketingimilu oqallisigineqaqqaassaaq.