Inatsisartut ataatsimiinnerat ippassaq naammassivoq
Inatsisartut upernaakkut ataatsimiinnerat ullunik 17-inik sivisussuseqartoq Siumut Atassutip Inuit Ataqatigiillu naalakkersuisooqatigiinnikkut ilaatigut misilinneqarfigisaat ippassaq naammassivoq.
Upernaakkut ataatsimiinnerup ulluisa pingajussaat aallartitsiaannaq unitsinneqarpoq naalakkersuisullu ataatsimiigiaqquneqarlutik. Ataatsimiinnerup unitsinneqarneranut pissutaavoq Piniarnermut naalakkersuisup Finn Karlsenip Great Greenlandimik misissuisoqaqqinnissaq pillugu maajip sisamaanni radioavisikkut oqaaseqarnera.
Finn Karlsen oqaaseqareersorlu aqaguani Inatsisartut ataatsimiinerat aallartitsiaannaq unitsinneqarpoq, unitsitsineq naalakkersuisut siulittaasuata Hans Enoksenip oqaloqatigiittariaqarnermik nassuiaaserpaa.
Taama pisoqarmat Namminersornerullutik Oqartussaqarfiup torsuusarsuini uiverneqalerpoq naalakkersuisooqatigiinnerlu misilinneqartoq paasinarsivoq siuttut mersersimarpasillutik naalakkersuisut ataatsimiittarfianut utikalermata. Ulloq imaalillartorlu ittuat anivoq inatsisartullu oqaluttarfianniit Finn Karlsenip Great Greenlandimut utoqqatsissutaa apuullugu.
Inatsisartut ataatsimiinneranni oqaluuserisassat 98-iusut akornanniippoq erngup nukinganik atuinerup inerisarneqarnissaanik naalakkersuisut siunnersuutaat 1 milliardit koruuninik naleqartussaq, Utoqqarmiut Kangerluarsunnguata Ilulissat Sisimiullu erngup nukissiuuteqarnikkut inerisarneqarnissaat amerlanerussuteqartunit taperserneqarpoq. Innuttaasut akerliussutsimik takutitsinerat kinguneqarpallaanngilaq Inatsisartuni amerlanerussuteqartunit partiit ullumikkornit annerungaartumik tapiiffigineqartalernissaat akuersaarneqarmat. Tassa partiit ataatsiakkaat agguaqatigiissikkaanni ukiumut 2 millioni koruunit sinneqartunik tapiiffigineqartalernissaat Inatsisartuni amerlanerussuteqartunit akuerineqarpoq.
Naalakkersuisut ilassinnissutaannut atatillugu maleruagaasanik sukaterinissaq amerlanerussuteqartut taperseriarlugu, ilassinnissutit millionit affaannik ikilineqarnissaannik Demokraatit siunnersuutaat tapersernartinngilaat. Saqqummiunneqarportaaq siorna 274 millioni koruuninik sinneqartoorsimanerup kingunerisaanik Nunatta karsia imaqarluartoq, aningaasalli ukioq manna aappaagulu aningaasanut inatsimmi amigartoorutissanut matussutigineqassapput.