Puisit amii Canadaminngaanneersuunersut Kalaallilluunniit Nunaanninngaanneernersut takusinnaanngikkaanni, puisit amiinik EU-mut Danmarkimullu eqqussuisarnissaq Danmarkimi uumasunik illersuiniaqatigiiffiup Dyrenes Beskyttelsep inerteqqutinngortikkusuppaa. Uumasunik illersuiniaqatigiiffiup pisortaa Ole Münster ima oqarpoq:
- Kalaallit puisinniartarnerat akerlilerniarneqanngilaq, akerlilerniagarpulli tassaavoq Canadamiut puisinniariaasiat, taannalu Kalaallit Nunaanni Namminersornerullutik Oqartussanit akuersaarneqartutut ippoq.
Canadami puisit avaartarlugit pisarineqartartut amerlaqisut suli uumatillugit ameerneqartarput, tamannalu uumasunik illersuiniaqatigiiffittut akerleraarput, Ole Münster oqarpoq nangillunilu:
- Taamaammat puisit amii Kalaallit Nunaanninngaanneernersut Canadaminngaanneernersulluunniit takusinnaanngikkaanni, puisit amiisa EU-mi Danmarkimilu eqqunneqarsinnaajunnaarnissaat anguniarparput.
Ole Münster aamma oqarpoq puisit Canadami pisarineqartartut, amminik nioqqutissiornissarsuaq anguniaannarlugu, apeqqutaannginnerarpaalu aallaammik avaartarlugilluunniit toqunneqartarnersut.
- Canadami puisit toqunneqartartut naalliutsinneqarujussuartarput. Kalaallit piniartuinut malersuiniarnerunngilaq, Canadamili amerlasoorsuanngorlugit piniartarneq akerlilerniarsaraarput, Ole Münster naggasiivoq.