Hans Enoksen naammagisimaarinnippoq

Inatsisartut upernaakkut ataatsimiinnerat ippassaq naammassivoq. Oqallisigisassat 16-it nalunaaquttap akunnerisa marluk ingerlanerinnaanni Inatsisartut ullaap tungaani ingerlappaat, 14-it aappassaaneerneqanngikkunik pingajussaaneerneqartut.

Ataatsimiinneq aporaaffiusaraluartoq Naalakkersuisut siulittaasuata, Hans Enoksen-ip, ajunngitsumik nalilerpaa:

- Ukiuunerani upernaajuneranilu ataatsimiinnerit qaammammik ataasiinnarmik akunneqaraluartut, isumaqarpunga naammaassinnilluarfiusimasoq. Aamma sulisugut minnerunngitsumik qutsavigerusuppakka, annertoorujussuarmik inuiaqatigiinni suleqataallutik pitsaasumik kiffartuussisimammata. Naak inatsisartuni aporfeqartaraluartoq, isumaqarpunga ataatsimiinneq naammassilluartoq.

Taama oqarpoq Naalakkersuisut siulittaasuat Hans Enoksen.

Naalakkersuisooqatigiilli ataatsimiinnermi ajutuungajalluinnarput. Aalisarnermut naalakkersuisoq, Finn Karlsen, Ammerivik pillugu oqaaseqarsimanini pillugu, Inatsisartut oqaluttarfianniit utoqqatsertitaavoq.

Naalakkersuisoqatigiillu kingumut ataannarput, inatsisartunilu sulineq piffissaq eqqorlugu naammassineqarluni.

Ukiakkut ataatsimiinnissaq septemberip ulluisa 15-ianni aallartissaaq.