Ilinniutit kalaallisoortut amerlanerusut

Nunaqavissut Suliffiutillit Kattuffiat, NUSUKA, SIK-mut isumaqatigiissuteqarpoq.

Kattuffiit taakku marluk ukiunut pingasunut atuuttussamik isumaqatigiissuteqarput.

Meeqqat Atuarfianni angusarineqartartut pitsanngorsaaffigineqarnissaat, tassungalu atatillugu kalaallisut ilinniartitsisarnerup nukittorsarneqarnissaa, Kattuffiit ilaatigut sulissutiginiarpaat.

Kalaallit oqaasii tunngavigalugit ilinniartitsissutinik ilinniarfinni peqalernissaq assersuutitut taaneqarpoq, taamaattoqalerpat ilinniarfinni taamaatiinnartartut ikileriassasut isumaqaramik.

- Assassornermut pikkorissorsuit danskisut atuagarsornermut piginnaasakinnertik piinnarlugu atuarfinniit taamaatiinnartarnerat ilisimavarput, NUSUKA SIK-lu allapput.

Inuusuttut ajornartorsiutaat angerlarsimaffinni nassaarisariaqartoq, SIK NUSUKA-lu isumaqarput.

Taamammat kattuffiit taakku marluk isumaqatigiipput, ilaqutariit aningaasaqarnerat, inissaqarniarnerat suliffissaqarniarneralluunniit pineqarpata, tamakku pitsanngorsaaqataaffiginissaannut suleqataarusullutik.