Motorcykelinik eqqusseqqusinnginneq sanaartoqqusinnginnerlu Folketingimit 1980-imiilli inatsisinngortinneqarpoq, inatsillu allanngortinniarneqalersaarnersoq nunatsinni naalakkersuisunut maanna apeqqutigineqartalereerpoq.
Motorcykelinik eqqussisinnaaneq sanaartorsinnaanerlu ammaanneqassanersoq, inatsisartunut ilaasortap Demokraatineersup, Lene Knüppelip, naalakkersuisunut apeqqutigaa:
- Aqqusinerni angallannermik inatsit nutaaq inatsisartuni ukiaru eqqartorneqartussaavoq. Taamaattumik tulluartuusoraara motorcykelinik eqqussisinaanissamut inatsisip nalilersoqqittariaqarnissaa, naalakkersuisunullumi apeqquteqaatinnut tamanna tunngaviuvoq.
Apeqquteqaammi, arfineq-pingasunik immikkoortortalimmi, ilaatigut apeqqutigineqarpoq Pituffimmi motorcykilersinnaaneq, nunalli sinnerani inerteqquteqarneq, pissusissamisoortutut naalakkersuisunit isigineqarnersoq.
Motorcykilinik nuannarisaqartumik Radioavisimi apersuinitsinnut atatillugu, motorcykilinik eqqussisoqalersinnaassanersoq sanaartortoqarsinnaalissanersorlu nittartakkatsigut apeqqutigaarput. Inuit 1556-it akisimasut akornanni 55 procentit missaat akuersaarput.