Umiarsualivinnik annertusaanissaq tamatta akisussaaffigissavarput

Umiarsualivinnik siunissami annertusaanissamut katillugit 400 millioni koruunit imaluunniit 660 millioni koruunit missaannik naleqartussamut aningaasaliinissami tulleriaarinissanilu kommuneqarfiit suleqataassapput aalajangeeqataallutillu. Umiarsualiveqarfinnik annertusaanissamut Naalakkersuisut siunnersuutaannut nassuiaat Inatsisartut ullumi ataatsimiinneranni saqqummiunneqartoq taama oqariartuuteqarpoq.

Pilersuinermi assartuinermilu qitiusumik inissisimasut Nuummi, Sisimiuni, Ilulissani kujataanilu umiarsualiviit pingaarnersiuilluni tulleriaarinissami salliutinneqarnissaat Naalakkersuisunit siunniunneqarpoq, tamannalu Inatsisartuni amerlanerussuteqartunit tapersersorneqarpoq. Taamaattorli Inatsisartuni ilaasortat ilaat isumaqarput Nuup saniatigut umiarsualiviit allat aamma salliutinneqartariaqartut. Atassummeersoq Godmand Rasmussen isumaqarpoq Sisimiuni umiarsualivimmik allilerinissaq pisariaqarluinnalersoq aalisariutit assartuutillu ataatsikkut talissimasariaqartarmata. Siumumeersoq Jens Lars Fleischer isumaqarpoq Uummannap nunaqarfiani Saattuni umiarsualiviup allineqarnissaa pingaaruteqarluinnartoq taajassuma qaleralinniarfissuunera pissutigalugu. Siumumeersoq Agnethe Davidsen, kommuneqarfiit akissallit allilerinissanut aningaasaleeqataanissaannik isumamut tikilluaqqusilluinnarpoq. Tulleriaanissaq pillugu ineqarnermut attaveqarnermullu naalakkersuisoq Jørgen Wæver Johansen ima oqaaseqarpoq:

- Pingaaruteqartut oqaatigineqartariaqarpoq Inatsisartuni tamaginnit tapersersorneqarmat Naalakkersuisuniit siunnersuutigineqartoq una; tassalu komunit annertusaanissami peqataallutillu aningaasalersueqataallutillu akisussaaffimmik annertunerujussuarmik tigusinissaannut periarfissiiumaneq.

Kommuneqarfiit ilaat aningaasaqarnikkut killeqarput, kisianni soorlu Nuuk illoqarfissuaq Atlantikulu ikaarlugu assartuutinut umiarsualiveqarfiusoq, allilerneqarnissamut akissaqassutsikkut piareersimalluinnartoq Jørgen Wæver Johansen assersuuteqarpoq.

- Qularutissaanngivissumik Nuummi umiarsualivik annertusaavigineqarsinnaavoq ilaatigut avataaniit aningaasalersuinikkut. Aamma qularinngilara umiarsualiviit allat annerusut taamatut inissisimassasut. Qularnanngittumik Sisimiuni Ilulissani immaqalu aamma Qaqortumi annertusaaniarnerit ilaatigut avataaniit aningaasalersorneqarsinnaapput.

Apeqqutigaarput kommunit akissaqanngitsut kingulliunissartik naatsorsuutigissaneraat. Akivoq:

-Taamaanngilaq, kommunit avataaniit aningaasalersorneqarnissaminnut ilimasussinnaanngitsut, nunatta karsianiit aningaasassaqartinneqarnerulissapput allat anginerusut sapinngisamik annertunerpaamik avataaniit aningaasaliiffigineqarpata.

- Imappoq avataaniit aningaasaliiumasoqarnera illoqarfinnut anginerusunuinnaanngitsoq tamatsinnulli iluaqutaasussaavoq.

Jørgen Wæver Johansen aamma oqarpoq ukiaru inaarutaasumik aalajangiinissap tungaanut, aningaasanullu inatsisip suliarineqarneranut atatillugu, naalakkersuisut suliarissagaat annertusaanissamut atatillugu tulleriiaarinissap aningaasarsiornikkut inuiaqatigiinnut kinguneqaatissaanik misissuinissaq. Umiarsualivinnik annertusaanissamik pilersaarut Ineqarnermut Attaveqarnermullu Pisortaqarfimmi suliarineqarpoq.