Attaveqarnermik namminersortunngorsaanissaq qanilliallanneqartoq

Nunatsinni attaveqaatitigut sullissinermik namminersortunngorsaanissaq qanilliallanneqarpoq Inatsisartut ippassaq ataatsimiinnerminni aalajangermata, nalunaarasuartaatitigut attaveqarneq sullissinerillu pillugit inatsisartut peqqussutissaattut siunnersuut, piginneqatigiissinnaanissamik namminersortungorsaanissamillu imaqartoq ataatsimiititaliamut ingerlateqqinneqassasoq.

Namminersortut attaveqaatitigut sullissinermi piginneqataalernissaannut nukittorsaasoqartariaqartoq, taamaattorli atuinermi akiusut assigiit, soorlu internettimik allatigullu attaveqarnerni akiusut attatiinnarneqartariaqartut Siumut isumaqarpoq, atuarfeqarfiit ilinniarfeqarfiillu kiisalu soorlu inuussutissarsiortut attaveqaatinik annertuumik atuisuummata.

Nalunaarasuartaatitigut attaveqarneq namminersortunngorsarneqassappat, attaveqarnermut aqqutsisoqatigiinnik naammagittaalliortarfimmillu pilersitsisoqartariaqassasoq Naalakkersuisut isumaqarput.

Nalunaarasuartaatitigut attaveqarneq sullissinerillu pillugit inatsisartut peqqussutissaattut siunnersuut, ukiamut aappassaanneerneqartigani ataatsimiititaliami suliarineqarnissaa Inatsisartut ippassaq taamaalillutik aalajangiuppaat.