Tele Greenland ukiuni tulliuttuni unamminartunik nalaataqartussanngorpoq; qarasaasiammi iluaqutsiullugit nalunaarasuarnikkut IP- telefonimik attaviliisoqarnissaa aningaasartuutigingaatsiartussanngoraa, TELE-mi siulersuisut siulittaasuata Kaj Egedep nalunaarutigaa.
Naatsorsuiffimmi kingullermi TELE Greenland akileraarutit ilanngaatiginagit 71 mio. kr.nik iluanaaruteqarpoq, siornaallu 25,5 mio. kr.nik iluanaaruteqarmat, iluanaarneq 46 mio. kr.nik pitsanngoriaateqarpoq.
Nuummi allakkerivitoqqap tuninerani iluanaaruteqarsimaneq 2005-mi iluanaarutaasunut peqqutaaneruvoq, pigisallu nalillit nalikillineqarneranni iluanaarutaasimapput.
TELE Greenland, naatsorsuutini piviusuni, 14 mio. kr.nik taamaalilluni iluanaaruteqarsimavoq.
Oqarasuaatit angallattakkat, oqarasuaatinit illuni attaveqartunit aningaasarsiuutaanerulersimapput. Nunatsinni innuttaasunit 57.000-iusunit 45.000-init amerlanerit angallattakkanik oqarasuaateqarput. Nunaqarfinni 90-t sinnerlugit inulinni oqarasuaatinik angallattakkanik atulersitsineq nunaqarfiit inuisa 90%-iisa periarfissaqalernerannik kinguneqarsimavoq.
Naalakkersuisunut ilaasortaq Jørgen Wæver Johansen TELE Greenlandip angusaanik naammagisimaarinnippoq.