Angut meeqqanik kinguaassiuutitigut atornerluisimasutut Nuummi politiit pasillugu marsimi tigusarisaata tigummigallarneqarnera sapaatip-akunnerinik sisamanik sivitsorneqarpoq, angutip eqqarsartaatsikkut misissorneqarnissaa pissutissaqarnersoq paasiniarneqassammat, taama vicepolitimester Bjørn Bay ilisimatitsivoq.
Angut meeqqanik arlalinnik kinguaassiuutitigut atornerluisimasutut pasillugu politiit marsimi tigusaraat. Nunatta eqqartuussiviata marsip ulluisa 24-ianni aalajangerpaa Nuup eqqartuussiviata sapaatip-akunnerinik marlunnik tigummigallagassanngortitsinera sapaatip-akunnerinik marlunnik ilaneqassasoq. Tigummigallagaanera qaammat kingulleq sapaatip-akunnerinik sisamanik sivitsorneqarpoq, maannalu sapaatip-akunnerinik sisamanik ilaqqinneqarluni.
Angutip meeqqat qassit kinguaassiutitigut atornerlussimanerai suli oqaatigineqarsinnaanngilaq, suli paasiniaanerit ingerlammata.
-Meeqqat atornerlunneqarsimasut pillugit saqqummerartut inniminarmata suliaq tamanut matoqqatinneqartoq, vicepolitimester Bjørn Bay oqarpoq.
Angut tigummigallagassanngortinneqartoq Nuummi pinerluuteqarsimasunut isertitsivimmiitinneqarpoq.