Nunaqarfinni atuarfiit siunissaat eqqarsaatigeqqittariaqarpoq

Kommuninit aallartitat Ilulissani ataatsimeersuarneranni aaqqissuusseqqinnissaq pingaarnertut ataatsimiissutigineqaraluartoq, taamaattoq allanik aamma eqqartuisoqarpoq.

Soorlu atuarfiit.

KANUKOKA-mi siulittaasuugallartup, Karl Lyberth-ip, siulittaasutut oqalugiarnermini ilinniarneq nunaqarfinnilu atuarfiit pillugit annertuumik oqalugiaateqarpoq. Nunaqarfinni atuartitaaneq pillugu arlalinnik apeqquteqarpoq, soorlu atuartut meeqqat atuarfianni naammassigaangamik ilinniagaqarlutik aallartittarnersut.

-Misilittakkat takutippaat, nunaqarfinni atuartut atuarfinnit anigaangamik, ikittuinnaat taamaallaat ilinniakkamik naammassinnittartut.

Karl Lyberth oqarpoq.

Nunaqarfinni atuarfiit qulit qulingiluat inorlugit atuartuuteqarput, taakkunanilu atuartut assigiinngitsunik ukioqaraluarlutik ataatsimut atuartinneqartarput. Nunaqarfinni atuarfiit allat 38-it 70-it inorlugit atuartuuteqarput, taakkunanilu ukioqatigiinngikkaluarlutik arlallit ataatsimut atuartinneqartarlutik. Atuarfiit aqqanillit ilinniarsimasumik ataasinnguamilluunniit ilinniartitsisoqanngillat, KANUKOKA-p siulittaasorigallagaa paasissutissiivoq.