SAS nutaamik pisortaanertaartussanngorpoq. Manna tikillugu pisortaanerusoq, Jørgen Lindegaard, ukiut tallimat pisortaaneroreerluni, tupaallannartumik, namminerli kissaatini malillugu, tunuartussanngorpoq.
- Misigisimavunga suliffeqarfissuaq nutaamik pisortaanertaartariaqartoq. Allamik pissanganartumik unammillernartumillu uanga ujaaserusuppunga, Jørgen Lindegaard oqarpoq. Taassuma SAS ukiaru qimassagaa, skandinaviamiut timmisartuutileqatigiiffissuat nalunaarpoq.
Jørgen Lindegaardip, maajip ulluisa allaqqaataanni ukioq 2001-imili pisortaaninngortup, kingoraartissaanik suli toqqaasoqanngilaq. Ukiuni Lindgaardip pisortaanertut sulinerani SAS milliarderpassuarnik amigartoorfiusarsimavoq. Taamaakkaluartoq amerlanerit isumaqarput, SAS-ip ullumikkut taama ingerlalluartigineranut Jørgen Lindegaard sunniuteqaqataalluinnartoq.
Pisortaanerup tunuarniarluni aalajangernera, SAS-imi siulersuisut siulittaasuata ajuusaarutigaa. Pisortaaninngormalli SAS ukiumut aningaasartuutit saqqummiunneqarmata aatsaavissuaq sinneqartooraluarpoq.