Napparsimasut qanigisaallu pitsaanerusumik atugaqalersikkuppaat

Kalaallit napparsimasut qanigisaasalu pitsaanerusunik atugaqartitaalernissaat Demokraatinit kissaatigineqarpoq.

Inatsisartut ullumi ataatsimiinneranni napparsimasup qanigisaata ataatsip ajornannginnerusumik akikinnerusumillu Danmarkimukartinneqartalernissaa partiinit oqallisigineqassaaq. Naluneqanngitsutut nunatsinni passunneqarsinnaanngitsut Danmarkimi pilatsittarput katsorsarneqartarlutillu.

- Ilimagaara taama aaqqiinissaq 3-4 millioni koruuninik akeqassasoq, siunnersuuteqartoq Astrid Fleischer Rex oqarpoq.

Aningaasat taakku Namminersornerullutik Oqartussat sanaartugassanut sillimmateqarfianiit atorneqarsinnaasut Astrid Fleischer Rex-ip siunnersuutigaa.

Napparsimasup qanigisaa Danmarkiliaassinermini suliffimminit sulinngiffeqartinneqartassasoq Astrid Fleischer Rex isumaqarpoq, taamaalilluni suliffimminit soraarsitaasinnaassanani.

Nunatsinni akiligassat aalajangersimasut qanigisaasumit akilerneqarsinnaaniassammata, qanigisatut angalaqataasup sulinngiffeqanermi nalaani akissarsiaqartinneqartarnissaa Demokraatinit aamma siunnersuutigineqarpoq.

Tamannalu Inatsisartut ullumi ataatmiilerpata inatsisissatut eqqartorneqartussaavoq.