Kalaallit Nunaat aningaasaliiffigaat

Piorsarsimassutsikkut Nunat Avannarliit Aningaasaateqarfiat Kalaallit Nunaannut aningaasaleeqqammerpoq. Pilersaarutinut pingasunut nunatsinniit qinnuteqartoqarsimavoq, tassalu taakku tamarmik akuersissutigineqarput.

Aningaasaliissutigineqartut katillugit 800.000 koruuniupput, taakku affaat qitimmik isiginnaartitsinermillu takutitsinissamut, ”Polaroid”-imik taaguuserneqarsimasumut atorneqassapput. ”Polaroid” Nunani Avannarlerni arlalissuarni ukiaru takutinneqaqattaartussaavoq.

Islandimiut suliniutinut aqqanilinnut qinnuteqarsimapput, qinnuteqaatinit taakkunannga arfineq-marluk akuersissutigineqarput, aningaasaliissutigineqarput 1 millioni koruunit sinnilaarlugit. Taakkunannga 200.000 koruunit tusilartunut festivaleqartitsinissamut, isiginnaartitsisartorpassuarnit nunanit allaneersunit peqataaffigineqartussamut, atorneqassapput. Naaralaartitsiveqarfiit Nunanilu Avannarlerni piorsarsimassuseq pillugu maajip naalernerani ataatsimeersuarnissaq 150.000 koruuninik aamma aningaasaliiffigineqarput.

Savalimmiormiunut inuusuttunut 18-iniit 22-inut ukiulinnut filmiliornermut soqutiginnissinnaasunut aasaanerani pikkorissartitsinissaq 200.000 koruuninik aamma aningaasaliiffigineqarpoq. Taanna Tórshavnimi juulimi ingerlanneqassaaq.