Meeqqat atuarfiini atuartut piginnaasaat misissorneqartariaqaraluarput, - soorlu Savalimmiuni taama pisimasut, taama oqarpoq, Demokraatit oqaaseqartartuat Palle Christiansen.
Sisamanngormat tamanut saqqummiunneqarpoq, nunat tamalaat meeqqat atuartut piginnaasaannik misissuisitsisarfiata PISA-p misissuinerata kingunerisaanik Savalimmiuni meeqqat atuartut assut piginnaasakitsuusut.
Maani nunami PISA aqqutigalugu misissuisitsisoqarsimanngisaannarpoq – tamannalu allanngortittariaqarpoq, taama Palle Christiansen oqarpoq.
- Misissuisoqaraluarpat imaassinnaavoq Savalimmiormiutulli tupatsigisugut, taamaattumik pingaaruteqarluinnarpoq misissuisoqarnissaa, taamaaliortoqareerpallu tamatuma iluarsineqarnissaa, Palle Christiansen oqarpoq.
Taannattaaq isumaqarpoq, Inatsisartut ukiaru ataatsimiilerpata meeqqat atuartut piginnaasaasa misissorneqarnissaannik naalakkersuisut peqquneqartariaqartut.