Uuliamut aqqut illoqarfeqqami Nigeriami illoqarfissuit ilaannut, Lagosimut, qanittumiittumi qaarmat inuit 200-t missaanniittut ajunaarput.
Lagosimi politiit pisortaat, Emmanuel Adebayo, oqarpoq, inuit 150-t 200-llu akornanniittut ajunaarsimasut.
Aalisartut illoqarfeerannguanni, Lagosip kujataatungaani kilometerinik 45-nik ungasitsigisumi, Atlas Creekimik taaneqartartumi, ajunaarneq pivoq.
Ikiuiniaqatigiiffiup Røde Korsip Nigeriami immikkoortortaani pisortaq oqarpoq, ajunaartut ilarpassui qallorneqareersut, taakkuli ilisarsaajunnaavillutik uutitersimasut.
Dunkit benziinamik imallit 500-t missaanniittut ajunaarfimmi nassaarineqarmarta, ilimagineqarpoq benziinamik tillinniartoqarsimasoq, tillitallu taakku dunkinut nassaarineqartunut immiunneqarsimagaluartut.
- Innarlisaariniat uuliap aqqutaanik ruujorersuarnik qillerillutik putoorisimapput, taamaalillutillu ikummatissamik tillinniarsimallutik. – Nigeriamiut taama ulorianartigisumik peqqunagit kajumissaarpavut, Røde Korsip Nigeriami immikkoortoqarfiani pisortaq, Orebiyu, nutaarsiassaqartitsivimmut AFP-mut oqarpoq. Inuit 1500-nit amerlanerit Nigeriami 1998-imili manna tikillugu assingusumik ajunaarlutik toqoreerput.
Røde Korsimit tusarfiit naapertorlugit inneq qaminneqareerpoq.