Qeqertarsuarmi puilasup ernganik tunisassiulernissaq tamanut ippassaq saqqummiunneqartoq isumalluarfiuvoq.
Piginneqatigiiffik – Greenland Spring Water –inuussutissarsiutinut naalakkersuisoq Siverth K. Heilmann peqatigalugu pilersaarutinik Hotel Hans Egedemi saqqummiussipput.
- Pilersaarut Qeqertarsuarmut aammalu inuiaqatigiinnut tassa imermik tunisassiortoqalersinnaanera assorujussuaq pissanganartuuvoq aammalu neriuutigilluinnarpara inuiaqatigiinnut tamanut iluaqutaalluarumaartoq. Ukiorpassuarni imermik tunisassiortoqalersinnaanera eqqartortarsimavarput, taamaattumik qilanaarpugut.
Qeqertarsuarmi kommunalbestyrelsemik aqagu naapitsinissatsinnut minnerunngitsumillu innuttaasunut Kalaallit Nunaata erngata avammut tunisassiarineqalernissaa aningaasarsiuutigineqalernissaanullu periarfissat paaseqatigiiffiusumik oqaloqatigiinnerit ingerlanneqartariaqarmata. Siverth K. Heilmann taama oqarpoq.
Pilersaarusiat Greenland Spring Waterip saqqummiussai annertupput. Qeqertarsuarmi puilasup erngata tunisassiarinissaanut aningaasat 2-300 millioni koruunit atorneqassapput. Naatsorsuutigineqalereerpoq sulisut 40-t 50-illu akornanniittut pisariaqartinneqassasut.
Greenland Spring Water-ip siulersuisuini ilaasortaq Adriano Viganó, pilersaarutit isumalluarnarnerarpai.
-Naatsorsuutigilluinnarparput puilasup ernganik tunisassiorneq siunissaqartoq, pissangaqaagullu, oqarpoq.
Greenland Spring Waterimi pigineqataassutit 51 procentii Schweizimiut suliffeqarfiannit Thoconimit pigineqarpoq, piginneqataassutillu sinneri 49 procentit kalaallinit pigineqassapput. Suliffeqarfiit piginneqataarusuttut pingasut massakkorpiaq isumaqatigiinniarfineqaleruttorput.
Suliffeqarfinnik amerlanerussuteqartussaq millionerpassuarnillu aningaasaliissuteqartussaq sooruna nunatsinnik soqutiginnittoq, kikkuppallu. Adriano Viganó aperigaluarparput iluatsitsitsivallaaratali.
Thoconimik piginnittut ilaat Europami puilasup ernganik tunisassionermik misilittagaqarput ilaalli misilittagaqaratik aningaasaliisuuginnarlutik.
Inuussutissarsiutinut naalakkersuisoq Siverth K. Heilmann aperaarput Namminersornerullutik Oqartussat aningaasaleeqataanissamik eqqarsarnersut.
-Toqqaannartumik Kalaallit Nunaanni massakkut uagut naalakkersuinikkut aningaasaliinngilagut, kisianni selskabi imermik tunisassiornissamut saaffiginnippoq taavalu aamma suleqatissarsiornerit aningaasaleeqataasinnaasullu ujartorlugit. Taamaattumik taanna suliaq ingerlagallassaaq. Siverth K. Heilmann taama oqarpoq.