Illoqqortoormiut takornarianit amerlanerusunit tikinneqartarusupput. Illoqarfiullu takornariaqarnermut allaffia nutaamik pilerisaaruteqalerpoq…tassa tammajuitsussarsiniarluni puisinniartitsineq.
-Neqeroorut nutaajulluinnarpoq, tassaqami nunatsinni allami taamaattoqarpa. Aallaaniartunillu danskinit isuma soqutigineqaqisoq, Karina Bernlow, Nanu Travel-imeersoq oqaluttuarpoq.
Oqaatigaa danskit aallaaniat arfinillit soqutiginnillutik Danmarkimi aallaaniartunut angalatitsivik Diana Rejser aqqutigalu saaffiginnissimasut. Illoqarfiup angissusaa uuttuukkaanni saaffiginnittut amerlanerarpaattaaq.
Maannakkorpiaq aallaaniat marluk puisinniarnerup pissanganartui Illoqqortoormiuni misiligarpaat; ippassarlu tikipput uuttunik tallimaraarsimallutik, aallaaniarneq iluatsilluartoq.
Puisinniarneq ilisimasortalerluni qimussimik sikukkut
ingerlanneqarpoq. Tammajuitsussarsiniap pisami amia, niaqua, pisamilu saniani assilisereerluni asseq pisarpaat, ilisimasortarlu akissarsiaqarpoq, neqaalu nerukkaatissani pisarlugu.