Agurki nunatsinni aningaasarsiutigissallugu naatitaq siulleq tunineqaqqammerpoq – 356 koruunilerneqarsimagillunilu. Neriussaagullu pisisup ukiuni tulliuttuni pingasuni agurkit naasartussat nuannaarutigilluarlugillu mamarsaatigisarumaarai.
Naatitsilluni misileraasoq tasaavoq Bent Olesen, Narsameersoq. Agurki sapaatip-akunnerata naanerani akitsorterussisoqarmat pisiarineqarpoq. Narsami innuttaasut akitsorterussinermi ussagarsimaqaat – oqarasuaatikkullu sinerissamiit aamma peqataasoqarsimasoq, Bent Olesen oqaluttuarpoq.
Narsaminngaaneersoq ajugaavoq – taanna naatitsivimmi utaqqisimavoq, oqarasuaatikkullu neqeroorut qaffasinnerpaaq koruunimik ataatsimik sinnerlugu neqeroorpoq. Taannalu aamma isumaqatigiissutigaarput, agurkit orpikkami tassani naasut tamaasa maajip 28-iata tungaanut aasarsinnaagai, Bent Olesen oqaluttuarpoq.
Naatitsivimmi agurkit orpigartaat 30-iupput, Bent Olesenillu naatsorsuutigaa, agurkinik karsimik ataatsimik sapaatip-akunnerata tulliata tungaanut katersisinnaassallutik. Taakku Narsami pisiniarfinnut tunineqassapput – ilaalli aamma suleqataasumut, INUILI-mut tunniunneqassallutik.