Irak-imi ullumi aassunneqisumik toqoraaneqarsimavoq. Biilit atorlugit qaartartuliat arlalissuit qaartinneqareersullu, ikinnerpaamik inuit 30-t toqutaapput 70-illu ikiligaallutik.
Tuluit sakkutuuisa qulimiguuliutaat arfininngormat nakkartinneqarmat, tuluit sakkutuui tallimat toqupput.
Shiamuslimit illoqarfianni illernartutut taaneqartartumi Kerbala-mi angallaffiusumi qaartartoq qaartinneqarmat inuit 21 toqupput 52-illu ikiligaallutik. Kikkut qaartartumeerisimanersut suli paasineqanngilaq.
Aamma Bagdadimi sunnimusliimit ineqarfiisa nalaani biilimik qaartartuliamik qaartitsisoqarmat inuit arfineq-pingasut toqupput 15-illu ikiligaallutik.
Ullup ataatsip ingerlanerinnaani Bagdadimi toqungasut timaat katillugit 42-t nanineqarsimasut, politiit nakorsallu nalunaarput.
Sunnimusliimit naalakkersuisuutitaqartut shiamusliimit toqoraanersuarnut pisuutitippaat. Sunnimusliimit isumaqarput, toqoraasarnerit politiinit sakkutuunillu iliuuseqarfigineqarneri naammanngitsut.