Aalisarnermut Piniarnermullu Naalakkersuisoq Finn Karlsen, ulluni kingullerni persarineqaraluaqisoq, avinngarussimasuni piniartunit tapersersorneqarpoq.
Savissivimmi Aalisartut Piniartullu Peqatigiiffianni Siulittaasoq Qaerngaaq Nielsen allappoq, aatsaat taamak Naalakkersuisumik paasinnilluarsinnaatigisumik peqalersimaneq piniartut Savissivimmi misigisimagaat.
- Namminersornerulerattali Naalakkersuisumik piniartunik paasinnilluarsinnaasumik aatsaat peqalerpugut. Assersuutigalugu ukioq kingulleq Naalakkersuisoq Uummannami qilalugartasseeqqimmat, qilalugarpassuaqarmammi. Oqaaseqaraangami piniartut isumaat eqqortarpai, taamaammat neriuppugut qinersiviup naanissaanut Finn Karlsen-i Naalakkersuisutut ingerlaannassasoq. Taama allappoq Savissivimmi piniartut aalisartullu peqatigiiffianni siulittaasoq Qaerngaaq Nielsen.
Great Greenland-imi pisimasut pillugit sapaatip-akunnerani kingullermi inatsisartuni eqqissiviilliortoqaleraluarpoq, ataatsimiinnerlu unitsinneqarluni. Naggataatigut Aalisarnermut Piniarnermullu Naalakkersuisoq Finn Karlsen oqaaseqaatigisimasani allakkatigut utoqqatsissutigai.