Hamas Sverigemut Norgemullu
Palæstinamiut naalakkersuisui Hamasikkunneersut arlalinnit akerlilersorneqaraluarlutik Sverigimut Norgemullu angalanialerput.
Palæstinamiuusimasut Europamiittut sapaatip akunnerata naanerani Sverigimi ataatsimeersuarniarput, qimaasullu pillugit naalakkersuisoq, Atef Adwan, peqataaniarluni allagartamik akuersissummik Sverigimut isissutissaminik pissarsisimavoq. Atef Adwanip akuersissummik pisimanera Sverigemi naalakkersuisunut ilaasortanit iluarineqanngeqaaq. Birgitta Ohlssonip Folkpartiimeersup Adwanip tikeraarnissaa ”ajuvissorsuartut” taavaa, ministeriunerlu Göran Persson kajumissaarpaa, isernissamut akuersissut arsaarinnissutigeqqullugu.
Nablusimi Hamasip siulittaasua, Adly Taish, Norgemi Stavangerimut kingusinnerusukkut aamma tikeraassaaq. Talerperliit partiiata siulittaasua, Leif Johan Sevlund, qaaqqusisuuvoq.