Kujataani angallanneq ataqatigiissaarneqartariaqarpoq
Takornariat piffissaq tikeraleruttorfiat qanillivimmat, Kujataani takornariartitsisartut tamarmik katersuuttariaqaraluarput taqqavani angallannerup ataqatigiissaarnissaa angusaqarfiginiarlugu, taamaaliornikkut takornariat nunaqavissullu angalajumasut pitsaasumik angallannikkut atugalissammata, taama oqarpoq nunatsinni takornariartitsinermi qullersaqarfiup, Greenland Tourism-ip pisortaanera, Stig Rømer Winther.
Namminersornerullutik Oqartussani Angallannermut Aattaveqarnermullu Pisortaqarfiup, Angallannermut immikkoortuata pisortaa Michael Pedersen ippassaq radioavisimut oqarpoq, Namminersornerullutik Oqartussat kujataani angallannerup aqatatigiissaarnissaa akisussaaffiginngikkaa.
Taamatut oqartoqarnera Greenland Tourism-imi pisortaanerup Stig Rømer Winther-ip eqqumiilluinnarnerarpaa Namminersornerullutik Oqartussat Kujataani angallannermik ataqatigiissaarissanngippata eqqumiimmat, nangipporlu.
- Namminersornerullutik Oqartussani Angallannermut Attaveqarnermullu Pisortaqarfik kaammattussavara, takornariaqarnermut attuumassuteqartut tamaasa piaarnerpaamik qaaqqoqqullugit, Kujataani takornariaqarnermik sullissivik Destination South Greenland aamma Greenland Tourism –ilanngullugit - ataatsimoorluta tamatta ajornartorsiut una qanoq iliorutta qaangerniassaneripput oqaluuseriniassagatsigu. Takoriat tikeralernissaat aajunaralaarsuanngorpoq, kissaatigaara takornariat tikeralinnginnerini ajormartorsiummik qanoq qaangiinissatsinnik angusaqassasugut, Greenland Tourism-ip pisortaanera Stig Rømer Winther oqarpoq.
