Israelimi parteertaap Kadimap siulittaasortaavata Ehud Ohlmertip naalakkersuisunngortitsinissamini suleqatissamilu inissitsiternerat Israelip inatsisartuini ullumi akuersissutigitippaa.
Ohlmertip Israelip kimmut killeqarfiisa ataavartussamik titarnissaat, sakkutuuminnillu tunuartiterinissaq neriorsuutigereerpaa. Piviusunngortissinnaaneralli nalornissutaavoq.
Israelip oqaluttuarisaanerani ukiuni 58-inngortuni kiisami killeqarfiit aalajangerlugit titarniarniarneqalerput. Parteertaami Kadimami siuttortaap Ehud Ohlmertip qineqqusaarnerminni neriorsuutigaa nunaminertani tiguakkaminni nunasisut, sakkutuumillu tunuartiternissaat.
Iliorneq sapiisernerussaaq, nunasisummi 70.000-it nuuttariaqassammata. Akerlilersortaasa pilersaarutit sinnatuinnaanerarpaat, piviusunngortinneqarsinnaanngitsut.
Kadimap suleqatigilissavai Sulisartut partiiat, juutillu uppeqqissaarniat partiiat. Amerlanerussuteqarlutik inatsisartuni inissat 120-usunit 67-it qulakkeereerpai, ministerillu 25-ussallutik.
Amerlanerussuteqaqqalaarnertilli pilersaarutiminnik piviusunngortitsinissaminnut sanngeequtiginngitsoortussaajunnaarpaat.
Israelip kimmut killeqarfigilertussaavaa Jordanip qoorua.
Naalakkersuisunngortussalli pilersaarutaasa piviusunngortinneqarnissaat qulartut soorluuna akornusersornialeraat.