Sorsunnerup Nillertup nalaani nunatta qanoq kalluarneqarsimanera danskit inatsisartuini oqallisigineqarmat ilaasortaatitatta aappaata, IA-meersup, Kuupik Kleistip, akissutigineqartut naammaginngilai.
Kuupik Kleist isumaqarpoq apeqqutigisani akineqarani inunnik ataasiakkaanik malersuininngorsimasoq.
Partiit oqaaseqartuisa ataatsilluunniit nunatta qanoq sunniuteqarsimanera taanngilaat.
-Allaanngivippoq oqallinneq sattaaserluni ingerlanneqartoq, Kuupik Kleist pakatsisimaqisoq oqaluttuarpoq.
Kuupik Kleistip eqqarsaatigilernerarpaa Sorsunnermi Nillertumi nunatta isertortumik peqataatitaasimanerata paasiniarneqarnissaa paasiniaasarfittaamut suliassanngortissanerlugu.