Taxartitsisut akitsuummut akerliupput

Sulisoqarnermut akitsuut naalakkersuisut inatsisartunut ippassaq siunnersuutaat taxartitsisunit nuannarineqanngilluinnarpoq. Akitsuut akuerineqassappat taxartitsisunut akissarsiarititat katinnerannit sulisitsisut 0,9 procentimik akiliuteqartalissapput.

Nuuk Taxi eqqarsaatigalugu ukiumut 400.000 koruuninik naleqassaaq. Nuuk Taxi-mi pisortaq Karen Bøggild taama naatsorsuuteqarpoq.

Taanna oqarpoq taxartarneq akitsorneqartariaqassasoq.

-Akitsuut atuutilissappat ilaasoq eqqorneqartussanngussaaq, taassumami akitsuut akilertussaassavaa, Karen Bøggild oqarpoq.

Karen Bøggild naalakkersuisunut inatsisartunullu naammagittaalliuteqarluni ullup ingerlanerani allagaqarniarpoq.

Akitsuut Inuussutissarsiutitigut ilinniagaqarnermut sulisitsisut akiliutaannut taarsiutaassaaq. Taxartitsisut, savaatillit aalisartullu ullumikkut tassunga akiliineq ajorput, akitsuulli atuutilissappat aamma akiliisalertussanngussapput.

Sulisoqarnermut akitsuut nunatta karsianut 57 millioni koruuninik isertitsissutaasassaaq.