Nanortalimmi isumalluaqaat
Royal Greenlandip Nanortalimmi fabrikkianik pisisut, Arctic Green Food, taqqavani aalisartut annertuumik isumalluarfigaat, eqinnaalluarunik Nanortallip avataani najugalinnut suliffissaqartitsisinnaalissagaluarmata.
-Taamatut ilaatigut oqartoqarsinnaavoq, tassa imaakkami, Nanortallip eqqaata aalisartoqassusia qiviarutsigu, Nanortalimmi fabrikki angisuujuvoq. Taavalu isumaqarpugut pitsaanerussasoq patajaannerussasorlu suliffeqarfik pillugu aamma allatut eqqarsarutta, taama oqarpoq Arctic Green Food-ip pisortaanera Tønnes Berthelsen, nangipporlu;
-Soorlu suliffeqarfeqarpugut, imaluunniit piginneqataaffeqarpugut, Nukik Seefood-imik atilik, taava taakku siulersuisui ataatsimeeqqissapput maajip naalernerani. Siullermik qanittukkut ataatsimiikkamik eqqartorpaat, Nanortalimmi fabrikkisisimanerput, taavalu tassani pilersueqataasinnaanermik aamma piumassuseqarput, taamaattumik ungasissorujussuunngikkaluartoq isigalugu, ataqatigiissaarnissaat siunertaralugu siulersuisut eqqartuisussaapput. Taamaattumik Nanortalimmut Qaqortumullu tunngatillugu isumallualaarpugut, tassa kujataata pilersornera eqqarsaatigiinnarnagu, nunatta Tunuani kujasinnerusumi aalisakkanik pisaqalaartussaagatta, taava taakkua tulaanneqartarsinnaaneri aamma isumalluutigaavut.
Arctic Green Foodip tunisassiat nunaqarfinnut, ilaatigullumi illoqarfinnut, suliareqqitassanngorlugit ingerlateqqittarai tusartareerlugu Tønnes Berthelsen aperaarput, Nanortalimmi tunisassiat nunaqarfinnut allanut illoqarfinnullumi suliareqqinneqartussanngorlugit ingerlateqqittassanerai.
Akivoq, tulaassorneqartut amerlassusiat apeqqutaasartoq. Kujataata nunataa annertoorsuunngimmat ataatsimut isigerusunneqarpoq, taamaattumik pilersorneqarneq ataatsimut Arctic Green Foodimit isigerusullugu, tassalu Qaqortoq Nanortalillu suleqatigiittariaqartut, pisortaq oqarpoq.
Nanortalimmi fabrikki maajip naannginnerani allartippat nioqqutissiorfiani aallaqqaamut inuit qulit missaanniittut aalisakkanik tarajorterisillugit sulisinneqarnissaat ilimagalugu, Tønnes Berthelsen aamma oqarpoq.