Uummannap Kommuneani atorfiit arlallit inuttaqannginnerat pillugu borgmesteri iliuuseqannginnerarlugu Atassutip naammagittaalliornera borgmesterip Siumumeersup paatsuungassutigaa.
Kommunaldirektørimik aningaasaqarnermullu pisortamik Uummannap Kommunea maanna pissarsiorpoq – inunnik isumaginninnermut pisortamik, aamma inunnut isumaginninnermut siunnersortit pisortassaannik, ungasinngitsukkut aamma pissarsiortussaassalluni.
Kalaallit Nunaanni Kommuneqarfiit Kattuffiannut, KANUKOKA-mut, aamma kommunit nakkutilliisuutitaannut, kommunalbestyrelsemut ilaasortat Atassummeersut allakkatigut ammasutigut borgmesteri isornartorsiorpaat.
- Tamanna paasisinnaanngilara, borgmester Jens Lars Fleischer oqarpoq, nangillunilu, siullermik:
- Pisortanik sulisussarsiorluta allagarsiinitta ersersippaa, pissutsit ilungersunartut qaangerniarsarigivut. Aappassaanik: -Kommunalbestyrelse apriilimi ataatsimiimmat Atassummut ilaasortat naammagittaalliornissaminnut periarfissaqaraluarput, taamali pisoqanngilaq, Jens Lars Fleischer oqarpoq.