IA-p Inussummut ilanngutissanerluni eqqarsaatigaa
Inuit Ataqatigiit siulersuisuunerisa namminersulernissarput pillugu suliniaqatigiiffimmut Inussummut ilanngussinnaanissartik maanna nalilersorpaat, sapaatillu akunnerata tulliani inatsisartut ataatsimiinnerat naammassiniariarpat aalajangertoqarnissaanik Inatsisartuni ilaasortaq IA-meersoq Kuupik Kleist ilimasuppoq.
- Suliniaqatigiiffiup anguniagaa namminersulernissaq isumaqatigaarput, taassumalu piareersarnerani Atlantikup avannaani qinikkat suleqatigiiffianni ilaasortaanera aqqutigalugu suleqataareerpunga, Kuupik Kleist oqarpoq.
Taamaattorli Inussummi partiit qinikkallu suleqataasut oqaaseqartarnissaat paatsuungatitsisarsinnaavoq, tassami suna tunuliaqutaralugu oqaaseqartoqarnersoq inissilluarneqartariaqassasoq, Kuupik Kleist isumaqarpoq.
Aamma kikkulluunniit Inussummi suleqataanissamut mattunneqannginnissaat Kuupik Kleistip pingaartuunerarpaa.