Mininnguaq Kleist Inussummi siulittaasunngorpoq

Namminersulernissarput pillugu suliniaqatigiiffimmi Inussuk-mi siulittaasunngorpoq 32-inik ukiulik Mininnguaq Kleist.

Mininnguaq Kleist Nuummi 1973-mi inunngorpoq peroriartornerminilu illoqarfinni arlaqartuni najugaqartarsimalluni. Nuummi GU-mi naammassigami Århus-ip universitetiani Filosofimik ilisimatusarpoq, 2004-imilu naammassilluni. Atlantikup avannaani qinikkat suleqatigiiffianni DNAG-mi allatsitut siunnersortitullu 2005-mi atorfinippoq. Ilinniarnermi naammassinermilu nalaani nunatsinnut pingaaruteqartunik nalunaarusioqataasimalluni. Atuakkioqataaffigisimavai Inuiaat inatsisitigut pisinaatitaaffii pillugit nalunaarusiaq 2004-mi saqqummersinneqartoq, kiisalu nunatta naalagaaffeqatigiinnermut 1953-mi ilanngunera pillugu nunatta savalimmiormiullu suleqatigiillutik nalunarusiaat 2004-mi naammassillugu saqqummiunneqartoq.

Mininnguaq Kleist Namminersulernissarput pillugu Ataatsimiititaliarsuarmi siunnersortitut ullumikkut aamma atorfeqarpoq.