Nannut nungutaanissaat aarleqqutigineqalerpoq

Nannut imermiutarsuillu uumasut nungoratarsinnaasut allattorsimaffiinut ilanngupput. Avatangiisit pillugit sullissisut nuimasut ilaat taama ilisimatitsivoq.

Nunani issittuni kissatsikkiartorneq maannakkutut sukkatigisumik ingerlaannassappat, nannut pingajorarterutaat ukiut

45-t ingerlaneranni Avatangiisinik ilisimasallit missingersuutaat malillugit nungussimassapput.

Imermiutarsuilli eqqarsaatigalugit taakku piniagaapilunnerat nungutaaratarnissaannut pissutaavoq. Kunngiitsuffimmi demokratiskiusumi, Congomi, imermiutarsuit isertorluni aallaaniartartunit piniarneqartarnerat pissutigalugu 95 procentimik 1994-imilli ikileriarsimapput.

Uumasunut nungutaaratarsinnaasunut nannut isaasalerlugu „pissusissamissut illersorneqarpallaarunnaarsimanerat“ pissutaavoq, imermiutarsuilli nungutaaratarsinnaasut allattorsimaffiini siornatigut allassimanngikkaluarput.

Uumasut nungutaaratarsinnaasut allattorsimaffiat Nunarsuaq tamakkerlugu Pinngortitap Illersorneqarnissaanut Suliniaqatigiiffimmit, IUCN-imit, suliarineqarsimavoq, nunat 81-t, avatangiisinut tunngassuteqartunut suliniaqatigiiffiit 850-init amerlanerit ilisimatusartullu 10.000-init amerlanerit IUCN-mut ilaasortaapput.

Uumasut naasullu 16.000-init amerlanerit nungutaasinnaasut IUCN-ip allattorsimaffiini nalunaarsorsimapput, nutaarsiassaqartitsivik Ritzau nalunaarpoq.