Nunatsinni inuit ikileriarput
Ukiut 13-t ingerlanerini aatsaat siullerpaamik innuttaasut amerlassusaat appariarpoq. Tamatumunnga tunngavilersuutiginiarneqarpoq inuusuttorpassuit nunarput qimagalermassuk.
Kisitsisini nutaani naatsorsueqqissaartarfiup saqqummiussaani allassimavoq ukioq manna januaarip aallaqqaataani nunatsinni innuttaasut 56.901-iusimasut. Ukiorlu kingulleq 2005-imi innuttaasut 56.969-iusimallutik, tassa imaappoq, innuttaasut ataatsimut isigalugit inunnik 68-inik ikileriarsimapput.
Tamatumunnga peqqutaatinneqarpoq, inuusuttut 15-t 24-illu akornanni ukiullit nunanut allanut nuttaleraluttuinnarnerat. 2005-imi nunamut allamut nuussimasut 124-iusimapput, ukiullu taassuma siuliani allaaneruvoq, tassa 2004-mi nunatsinnut nuuttut avammut nuuttuniit amerlanerusimammata, 2004-mi 15-iniit 24-inut ukiullit nunatsinnut nuussimasut 13-iusimapput.
Naatsorsueqqissaartarfilli naapertorlu tamanna ernumanartoqanngilaq, inuusuttummi uku ilinniarnerup nalaani aallarsimasuummata, uteqqikkumaarnissaallu aamma ilimanarmat.
Ukiut marluk matuma siorna aamma avammut nuuttut nunatsinnut nuuttuniit amerlanerusimapput.
Ernumanartuali unaasinnaavoq kisitsisit nutaat takutimmassuk inuit avammut nuuttartut ukiuisa pisoqaliartornerat. Ukiummi qulit ingerlaneranni 25-t 34-illu akornanni ukiullit ikinnerusimapput, tamannalu peqquteqarpoq 70-kkunni inuit erniornikinnerusimanerat.
Tamatumalu aamma kingunerisinnaavaa siunissami erniortussat ikinnerunissaat, tassami 25-inik 34-inillu ukiullit ikinneruppata aamma erniortussat ikinnerussapput, taakkuuppullu ukiuni makkunani erniuleruttortussaagaluit.
Taamatuttaaq inuit inuuneqqortusiartuinnarnerat erseqqissaatigineqarpoq taamaalillunilu isumaginninneq sualutsikkiartussagunarluni, tassami imaalissammat inuusuit ikinnerussuteqarlutik utoqqarnik amerlanerussuteqartunik nammataqalertussanngussammata.
Naatsorsueqqissaartarfiup allakkiaani aamma allassimavoq, innuttaasut akornanni angutit arnaniit amerlanerummata, tamannalu tunngaveqarpoq, tikisitat angutit amerlanerussuteqartarmata. Taamaalilluni innuttaasut akornanni angutit amerlanerussuteqalerlutik.