Pisiffiup neqit Skare-meersut oqallisaanerat tupaallaatigai
Danmarkimi neqinik mikiartunik nioqquteqarnerup ulluni kingullerni oqallisaanerani paasinarsivoq nunatsinnissaaq neqaarnianit Skaremeersunit Pisiffik Brugsenilu pisisarsimasoq. Aviisimi Ekstra Bladetimi kingullertigut neqaarniaqatigiit qulaajaaffigineqarput.
Pisiffiup pisortaata Michael Østergaardip tupaallaatiginerarpaa, pisullu malinnaavigeqqissaarnerarlugit.
-Neqimmi nioqqutivut nutaanngilisimasut paasigutsigik ingerlaannaq nioqqutaajunnaarsissavavut, Michael Østergaard nalunaarpoq.
Oqaatigaattaaq sinerissami pisiniarfiutimi qerititsivii misissuiffigitissimagini.
Pisiffiup neqit pisiarisartakkami qulerarterutai Skaremit pisiarisarpai.
Brugseni paasiniaavigineqarmat paasinarsivoq ukiup affaata matuma siornali Skaremit neqisisarunnaarsimasoq.
-Neqit pitsaassusaat naammaginnginnatsigu, Brugsenip pisortaanera Olav Thomsen nassuiaavoq.