Karl Lyberth siulittaasuugallassaaq
Skrevet af Najaaraq Egede
Karl Lyberth KANUKOKA-mi siulittaasuugallassaaq.
Kalaallit Nunaanni Kommuneqarfiit Kattuffianni siulersuisut ippassaq ataatsimiinnerminni aalajangerpaat Maniitsumeersoq Karl Lyberth, Siumut, kattuffimmut aallartitat maajip 17. aamma 18. ileqquusumik ataatsimiinnissaata tungaanut siulittaasuugallassasoq. Maannamut siulittaasuusoq Lars Karl Jensen marsip 24-annili qaratsamigut aanaartuutsiarnermi kingunerisaanik napparsimasutut uninngaqqusaavoq. Pisortaq Martha Labansen oqarpoq Kattuffimmi siulersuisut pingaartikkaat Lars Karl Jensenip eqqissilluni peqqissiartornissaa. Aaqqissuussaanermik iluarsaaqqinnissap Inatsisartuni oqallisigineqangajalernerani KANUKOKA-p siulittaasoqarnikkut erseqqissumik inissisimanissaa aamma pingaartinneqarpoq.