Egyptenimi danskit tallimat ikiligaapput
Skrevet af Najaaraq Egede
Egyptenimi qaartartumeerisoqaqqippoq, tamatumuuna illoqarfik takornariaqarfiulluartartoq Dahab eqqugaavoq.
Ikinnerpaamik inuit 23-t ajunaarput, 60-illu sinneqartut ikiligaallutik, taakkunannga tallimat qallunaajupput.
Egyptenimi taama pisoqaraluartoq Danmarkimi angalatiteqatigiiffik Apollo Rejser timmisartoq ulikkaangajassimasoq Københavnimit ullaaq Egyptenimut aallartippaa. Egypteniliartussaagaluit 30-t angalanissaminnik unitsitsiinnarsimasut angalatitseqatigiiffimmit nalunaarutigineqarpoq, taakkuli akiliutigisimasatik annaassavaat, aatsaammi Nunanut allanut ministereqarfik Egyptenimut aallartoqaqqusinngippat bilitsit akii utertinneqarsinnaasartut, pisortaq Jan Lockhart oqarpoq.