Indianerit naggueqatigullu taarsiivigitilerput

Indiaanerit canadamiittut naggueqatigullu inuit 86.000-t missaanniittut kristumiut ileqquinik ilinniartinneqarnissaat kiisalu tuluttuinnaq oqaaseqarnissaat pillugu pinngitsaaliissummik atuarfinnut nerisaqarfiutigaluni ineqarfiusunut inissinneqartarsimammata aningaasanik taarsiivigineqartussanngorput.

Ullualunnguit qaangiuppata, canadami indiaanerit naggueqatigullu, Inuit , 86.000 missaannik amerlassusillit naalagaaffimmit aningaasanik taarsiivigineqartussanngorput. Taakku meeraatillutik pinngitsaaliissummik atuarfinnut nerisaqarfiutigaluni ineqafiusunut tassa kostskolenut, inissinneqarsimanertik taarsiivigineqaassutigissavaat.

1800-kkunnili Canadami meeqqat nunap inuiisa, pinngitsaaliissummik kostkolinut nuutsinneqartarsimapput. Taamanikkut naalagaaffik isumaqarsimavoq nunap inuii pitsaanerusumik atugaqartinneqassappata, kristumiut ileqquinik ilinniartinneqartariaqassasut tuluttuinnarlu oqaaseqartariaqartut.

Naatsorsuutigineqarsimavortaaq kinguaariit amerlanngitsut ingerlaneranni nunap inuiisa ileqqutoqaat, oqaasiilu nungutinneqarsinnaassasut. taama CBC allappoq.

Atuarfinnut kristumiuussuseq tunngavigalugu atuartsitsiviusunut meeraanerminni inissinneqartarsimasut 86.000 suli inuupput, taakkualu akornanni kinguaassiutitigut atornerlunneqartarsimasut amerlasimaqalutik.

Meeraallutik kostkolinut pinngitsaaliissummik inissinneqarsimasut tamarmik 10.000 dollar-inik taarsiivigineqassapput. Taakku danskit aningaasanngorlugit 50.000 kroningajaat missaanni naleqarput.

Kingorna ukiut qassit kostskole-miissimanertik najoqqutaralugu ukiumut 3000 dollar-inik taperneqartassasut aamma oqaatigineqarpoq.

Meeqqat amerlaqisut atuarnerminni oqaatsit ilitsoqqussatik piugorsimavaat, kingunerisarsimavaalu angerlaraangamik angajoqqaatik oqaloqatigisinnaasarsimanagit.

Atuarfik kristumiuussuseq tunngavigalugu atuartsitsiviusoq kingulleq 1991-imi matuneqarpoq.