Nepalimi akersuuttoqaqqippoq
Nepalimi unnuaq kingumut akersuuttoqarneratigut pikitsitsiniat maoistiusut tallimat sakkutoorlu ataaseq toqutaapput. Pikitsitsiniat oqarasuaatikkut attaveqaatinut napasuliaq saassummassuk taama pisoqartoq, Nepalimi sakkutuut avammut oqaaseqartitaat oqarpoq.
Chautarami – illoqarfiit pingaarnersaata Kathmandup 120 kilometerinik avannaq-kangisinnerusortaani saassussinermi - aallaasit qaartartullu miloriuttakkat atorneqarsimapput.
Nepalip kunngia Gyanendra innuttaasunik aneqqusiunnaarpoq, kikkulluunniit nalunaaquttap aqqarnup arfernullu akornanni aqqusinikkoortut aallaaneqassasut unnerlugu. Nepalimi naalagaaffiup tv-ata nutaarsiassaasigut taama nalunaartoqarpoq.
Demokratiimik illersuisut akerliussutsiminnik aqagu kunngip tunuarnissaa anguniarlugu takutitsisaqattaarniarput, soorlu sapaatip-akunnerata naanerani tusindilippassuit aneqqusaanngikkaluarlutik taamaaliortut. Kathmandumi akerliussutsimik takutitsisut avissaartinniarlugit politiit sakkutuullu eqqaassilermata arlallit ulluni kingullerni ikilersissimaneragaapput.